Banana Cake ~~ كيكة الموز

نص كوب زبدة أو زيت

كوب ونص سكر

بيض عدد 2

كوبين طحين

نص ملعقة صغيرة ملح

ربع ملعقة صغيرة باكينغ باودر

نص كوب حليب

ربع ملعقة صغية فانيليا

تلات أرباع ملعقة صغيرة كربونات الصودا ( بنخلطهم مع الموز بعد ما نهرسهم )

 موز 3 مستويين مهروسين وإذا كانوا صغار بنحط 4

أول شي بنخفق السكر مع الزيت 

بنضيف البيض وبنخفق ليتجانسوا منيح

بنقوم بتنخيل الطحين عدة مرات ثم نضيفله الملح والباكينغ باودر

بنضيف الحليب والطحين لخليط البيض طبعا بالتناوب على فترات بنبدا بالطحين وبننهي بالطحين

آخر شي بنضيف الموز ( ما ننسى نضيفله كربونات الصودا ) والفانيليا

بنشويهم ع درجة حرارة 180 لمدة 45 دقيقة

وصحة وهنا 

فـيــتوتـــشــيني ألـفـريـدو

1 بصلة مفرومة ناعم

2 سن توم مفروم

4 صدور دجاج مقطعة قطع صغيرة 

زيت زيتون أو زبدة

فطر طازج مقطع

كريمة طازجة للطبخ

بهارات : حسب ما بتحبي ملح , فلفل, جوزة الطيب, اوريجانو

فيتوتشيني مسلوق

جبنة برمزان مبشورة

الطريقة

نحمر البصلة بالزيت.. نضيف التوم نقلبهم حتى يتحمروا قليلاً

نضيف الدجاج نقلبه ثم نضيف البهارات وبس يقارب عالإستواء بنضيف الفطر

نضيف الكريمة الطازجة أنا إستخدمت 500 مل وكمية من جبنة البارميزان وعلى نار خفيفة حتى تسخن 

بهالوقت بنكون سلقنا الباستا بماء ساخن مع إضافة الزيت والملح للماء حتى لا تلتصق أثناء عملية السلق

بعد أن تستوي نصفيها ونضيفها لصلصة الكريمة والدجاج والفطر وهون أنا ضفت كمشة من جبنة الموزاريلا 

بنحطها بطبق التقديم ،، بنرش عليها جبنة بارميزان وأوريجانو 

وصحة هنا

 

الكيكة الوردية بحشوة الأناناس

كوبين طحين

كوب سكر ناعم

كوب حليب

كوب زيت نباتي

معلقتين طعام باكينغ باودر

بيض عدد 4

مُلون طعام أحمر

معلقتين مركز طعم الفراولة بكون متل قنينة الملون بس هدا بطعم الفراولة

~~ الطريقة 

بنخفق البيض مع مركز طعم الفراولة 

بنضيف السكر وبنخفق منيح

بعدين الزيت وبنخفق

وآخر شي الحليب وبنخفق شوي

وبنبلش نضيف الطحين المنخول مع الباكينغ باودر

وبنضيف ملون الطعام ،، طبعا حسب درجة اللون يللي بنفضلها 

بنصب الخليط بصينيتين مقاس 24 أو قالب كيك واحد حسب الرغبة

بنخبزها لمدة 45 دقيقة أو حتى تستوي

بس تبرد بنقسمها بنشربها عصير فراولة شوي وبنحشيها كريمة وأناناس

بنعمل كريمة مغلفين دريم ويب مع حليب حسب الإرشادات

وعلبة قشطة وحبتين كيري

وبنزينها حسب الرغبة وصحة وهنا

كيـــكة النــسكــافيه

كوبين طحين

كوب سكر ناعم

كوب حليب

كوب زيت نباتي

معلقتين طعام باكينغ باودر

فانيلا

بيض عدد 4

معلقتين نسكافيه

~~ الطريقة 

بندوب النسكافيه بالحليب عالنار شوي حتى تدوب

بنتركه على جنب حتى يبرد

بنخفق البيض مع الفانيلا

بنضيف السكر وبنخفق منيح

بعدين الزيت وبنخفق

وآخر شي الحليب وبنخفق شوي

وبنبلش نضيف الطحين المنخول مع الباكينغ باودر

بنصب الخليط بصينيتين مقاس 24 أو قالب كيك واحد حسب الرغبة

بنخبزها لمدة 45 دقيقة أو حتى تستوي

بس نتطلعها وتبرد تماما

بنحضر كريمة النسكافيه ويللي هي عبارة عن

مغلفين دريم ويب

بنعملهم متل مو مكتوب عليهم مع إضافة نسكافيه عالحليب يللي رح نخفقهم فيه

وعلبة قشطة

بنقسم الكيكة طبقات وبنحشيها من الكريمة وبندهنها من برة 

وصحة وهنا 

جيلو الــكرز الــوردي ~~ Pinky Cherry Jello

ظرفين جيلو كرز حيواني

علبة قشطة وزن 170 

ماء ساخن وبارد لعمل الجيلو

بنحضر أكواب التقديم

بصحن عميق بنعمل ظرفين الجيلو متل مو مكتوب عالباكيت

بس يدوب بنحطه بالخلاط مع القشطة وبنخلطه

بنصبه بالأكواب

بنتركهم مكانهم بدون تحريك حتى يبردوا منيح ويبلشوا يجمدوا

وبنحطهم بالتلاجة يجمدوا عالآخر

بس يجمدوا رح يصير عنا طبقتين 

طبقة الجيلو وطبقة القشطة يللي فوق

بنزينه بالكريما 

وصحة وهنا

جيــلو الربيع ~~ Spring Jello

ظرف جيلو ليمون أصفر حيواني

ظرف جيلو ليمون أخضر ~~ لايم حيواني

علبة قشطة وزن 170 

ماء ساخن وبارد لعمل الجيلو

بنحضر أكواب التقديم

بصحن عميق بنعمل الجيلو الأصفر متل مو مكتوب عالباكيت

بس يدوب بنحطه بالخلاط مع نص علبة القشطة وبنخلطه

بنصبه بالأكواب بدون ما نعبيهم

بنتركهم مكانهم بدون تحريك حتى يبردوا منيح ويبلشوا يجمدوا

وبنحطهم بالتلاجة يجمدوا عالآخر

بس يجمدوا رح يصير عنا طبقتين 

طبقة الجيلو وطبقة القشطة يللي فوق

بس يكون جمد منيح بنعمل الجيلو الأخضر بنفس الطريقة

وبنصبه شوي شوي بالكاسات

وبنتركه مكانه نفس الشي

هون عنا بس حطيت الأخضر لسا كان طبقة وحدة والجيلو الأصفر كان صاير طبقتين

وصحة وهنا :)