Strawberry Marble Cake

كوبين طحين
كوب سكر
كوب زيت
كوب حليب سائل
3 بيض
ملعقتين صغار باكينغ باودر
معلقة فانيليا
مُلون طعام أحمر
روح الفراولة ( strawberry essence ) بكون قنينة صغيرة متل الفانيليا السائلة بس طعم الفراولة

بنخفق البيض مع السكر
بنضيف الزيت وبنخفق ،، بنضيف معلقة صغيرة من روح الفراولة
بنضيف الطحين (بعد تنخيله مع الباكينغ باودر) بالتدريج بالتناوب مع الحليب

بنصب الخليط بقالب الكيك وبنترك مقدار تلات أرباع الكوب على جنب
بنضيف لهالمقدار معلقة صغيرة مُلون طعام و معلقة روح الفراولة

وبنصبه فوق الخليط يللي بالقالب وبطرف السكين بنعمل تعرجات
وبالفرن على درجة حرارة 180
لمدة 40 دقيقة

وصحة وهنا

ســـباغيتي بــكُـرات اللحمة

الطريقة:
لحمة مفرومة مع بصل وبهارات مشكلة وملح وفلفل أسود
بنضيفلها شوية بقسماط وبنعجنها وبنكورها وبنتركها بالتلاجة نص ساعة

صوص بندورة خاص للباستا ( بنجيبه من السوبرماركت ) حجم كبير
حبتين بندورة كبار مقشرين ومفرومين مربعات صغيرة
بصلتين حجو وسط مفرومين صغير
شوية مي
زيت قلي

معكرونة سباغيتي ،، بنسلقها بمي مغليه مضاف إلها ملح وزيت حتى ما تلزق


بنجهز صينية أو طنجرة بنحط زيت زيتون وبنحمر اللحمة فيه
بنشيلها وبنتركها على جنب
بنفس الصينية بنحط شوية زيت زيتون وبنضيف البصل بنحطله ملح وفلفل أسود وبنشوحه
بنرجع بنحط اللحمة على البصل وبنتابع تشويح
بنضيف البندورة وبنحركهم حتى تدبل البندورة شوي
بنضيف صوص البندورة ( أنا حطيت العلبة كلها ) ومقدار نص كوب مي سخنة
ممكن نزيد الملح حسب الطعمة ،، ( هب الصوص بتكون مبهرة وجاهزة )

بنخليها تغلي عالنار نص ساعة وبنقدمها

بنرش على وجه الصحن جبنة برميزان وصحة وهنا :)

محشي ورق لــســـان

الطريقة:

بنغسل الورق منيح وبنسلقه عالسريع حتى يطرى شوي

بس ما نطول يادوب خمس دقايق

بس نطلعه بنحطه بمي باردة ،، 

بعدين بنرجع نغسله منيح

بنحضر الحشوة يللي هي عبارة عن 

رز ولحمة وبهارات متل الورق دوالي

بنحشيه وبنرتبه بالطنجرة

بنحط مي وبنخليه ليستوي وتروح المي

وصحة وهنا

كــيكـــة اللـــيمـــون

كوب لبن

تلت كوب زيت زيتون

بشر ليمونة

ربع كوب عصير ليمون

بيضتان

فانيليا 

كوب سكر ناعم

كوب وتلات أرباع الكوب طحين

ملعقة ونص صغار باكينغ باودر

رشة ملح

نخفق البيض مع الفانيليا ونضيفله برش الليمون

نضيف السكر ونضيف المواد السائلة ونخلطهم

نضيف للخليط الطحين بعد تنخيله مع الباكينغ باودر والملح

نضعها بالفرن حتى الإستواء وبعد ما تبرد نرشها بالسكر الناعم وبرش الليمون

وصحة وهنا

سلطة الشومر والجزر

جزر مبشور

شومر مغسول ومفروم شرحات رفيعة

بصلة حمرا كبيرة مفرومة شرحات رفيعة

عصير ليمون ،، ملح وزيت زيتون

بنخلط المكونات وبنضيفلهم الملح والزيت والليمون

عند التقديم بنرشلها شوية سماق عالوجه وصحة وهنا 

:)

فـــريكة ،، منسف الفريكة

: المقادير

فريكة 3 كاسات (مغسولة منيح و منقوعة نص ساعة)

بصل مقطع صغير 

زبدة نباتية وشوية زيت نباتي

ملح وفلفل أسود

دجاج (حسب العدد المراد الطبخ له)

الطريقة:

نغسل الدجاج و نبهره وننقعه بخلطة وهي عبارة عن

زنجبيل فريش مبشور كمية قليلة / جوزة الطيب / هيل مطحون / ملح / فلفل / بهارات مشكلة / عصير نص برتقالة فريش / لن رايب ملعقتين كبار وزيت نباتي / ورق غار حسب الرغبة و كبش قرنفل

نخلطهم كلهم وندهن الدجاج بهم ونتركهم منقوعين ثم ندخلهم الفرن للشوي

الفريكة:

بعد غسيلها جبداً نضع البصل المقطع بالطنجرة مع قليل من الزيت النباتي ونقلبهم مع إضافة ملح 

بعد ذلك نضيف الفريكة ونقلبها جيدا

نتابع التقليب لفترة 15 دقيقة ونضع القليل من الزبدة النباتية عليها (حسب الرغبة)

بعد ذلك نضيف الماء المغلي ولكن يجب مراعاة أن لا يعلو عن الفريكة 

يعني بنضيف شوي وبعدين حسب الحاجة بنصير نزيد شوي شوي عشان ما تخبص معنا

نضيف مكعب مرقة الدجاج أو 2 حسب المذاق

أهم شي تقليبها وتشويحا بالزيت والبصل 

عندما تجهز نقدمها بصحن التقديم ونضع الجاج فوقها ونزينها باللوز المقلي ونقدم معها السلطة واللبن 

وصحة وهنا

الدجاج المحشي بالأرز

دجاجة كاملة 

بنغشل الدجاجة منيح وبنخليها تتصفى من المي

بنبهرها بالبهارات يللي بنحبها 

فلفل ملح بهارات مشكلة كركم وهيل مطحون 

يعني كل شت بيت وذوقها بالبهارات 

طبعا بنبهرها من جوا ومن برا

طريقة الأرز

المقادير

لحمة مفرومة

بازيلاء وجزر 

رز مغسول (كاستين رز مصري وكاسة رز أمريكي ) ومنقوع

بهارات : ملح ، فلفل ، بهارات سادة ، بهارات مشكلة زنجبيل ناعم رشة 

رشة قرفة وهيل ناعم 

الطريقة

بنحط زيت بالطنجرة وبنحطه عالنار وبنضيف اللحمة 

بنضيفلها البهارات المذكورة فوق

بنشوحها منيح حتى تنزل ميتها وتقرب تستوي

بنضيف البازيلا والجزر وبنقلبهم منيح

بنضيف كمية من الماء وبنخليها تغلي

بنحاول ما نكتر مي ،، بس نضيف الرز إذا إحتجنا مي زيادة بنزيد

بعد الغليان بنصفي الرز المنقوع وبنضيفه للطنجرة

بنحركه وبنشوف إذا لسا ما إستوى وبحاجة مي ويادة بنزيد

 بنخليه يبرد  شوي

بنقلي لوز أو أي مكسرات بنحبها 

بناخد كمية من الأرز لحشي الدجاجة ،، بنضيفلها شوية مكسرات وبنحشيها بالجاجة

بنسكرها وبنخيطها حتى ما تفتح خلال الشوي

بنلفها بورق القصدير وبنعمل فتحات بطرف السكين وبنحطها بصينية الشوي وبنحط شوية مي بالصينية

بنشويها حتى الإستواء وبنفتح القصدير وبنحمرها

عند التقديم ،، بنحط الدجاجة بالصحن وبنفرد حواليها الأرز يللي عملناه وبنزينها بالمكسرات المقلية 

وصحة وهنا