الجمعة، 2 ديسمبر 2011

♥ Eggs ♥

♥ Eggs ♥




Scrambled Eggs with Hot dogs


أربع بيضات 
نقانق مقطعين دوائر 
زيت نباتي
ملح وفلفل

بنخفق البيض بزبدية وبنرش عليه ملح وفلفل 
بنحضر مقلاية وبنحط فيها زيت نباتي مقدار معلقتين
بنضيف النقانق .. وبنحرك حتى يتحمروا شوي
بنضيف البيض وع طول بنحركه حتى يتجانس مع النقانق بعدين بنوقف التحريك
بس نشوف أطراف البيض بلشت تطلع وتستوي بنحركه وبنضل نحرك حتى يستوي
وبنقدمه بصحن وبنرش عالوجه فلفل أسود





Scrambled Eggs with Cheddar Cheese


بيض عدد 2
سلايز جبنة شيدر مقطع لـ 9 مربعات
ملح وفلفل
زيت نباتي

بنخفق البيض بزبدية وبنرش عليه ملح وفلفل 
بس يتخلطوا منيح بنضيف 5 مربعات جبنة وبنحركهم شوي شوي 
بنحمي الزيت بالمقلاية
بنضيف البيض وبنخليه بدون تحريك
بس تبلش الأطراف تطلع وتستوي بنحرك البيض بشوكة 
بنتابع التحريك بس شوي شوي وقبل ما نطفي النار بنحط باقي الجبنة عالوجه بدون تحريكها
بنقدمه بالصحن وبنرش شوية فلفل عالوجه





بيض عيون


بيضة 
ملح وفلفل
زيت للقلي

بنحط الزيت بالقلاية وبنضيفله ملح وفلفل 
بنخليه يسخن وبنضيف البيضة عالمقلاية ع طول
بمعلقة بنضيف من الزيت يللي حول البيضة عالبيضة حتى تستوي من فوق
عشان نتأكد من إستواء الصفار بطرف المعلقة بنضغط عليه وبنحط عليه زيت من يللي بالمقلاية
طبعا ناس بتحبه يكون نص مستوي وناس مستوي كتير
كله حسب الرغبة

وصحة وهنا



الأربعاء، 9 نوفمبر 2011

Chocolate Balls


C H O C O L A T E B A L L S





الطريقة

بدنا المكونات التالية




قالب كيك ع شوكولاتة من الباكيتات الجاهزة يللي بنضيفله مي وزيت وبيض
بنعمله قبل بيوم وبنخليه يبرد

باكيتين بسكوت ماري

علبتين حليب مكثف محلى

جوز هند

ملونات طعام

معلقة كاكاو بودرة
~~~


أول شي بنفتت الكيك وبنفتت البسكوت وبنخلطهم سوا وبنحط معلقة الكاكاو وشوية جوز هند وبنخلطهم




بنضيف الحليب المكثف وبنحرك منيح.. بنتركه بالتلاجة يجمد عشان نعرف نشكله


هلأ بنيجي لجوز الهند

بكيس نايلون بنحط كمية من جوز الهند زبنصب فوقه كم نقطة من ملون الطعام وبنسكر الكيس وبنخلطه
(بنخض الكيس عشان يتوزع اللون منيح)

وبنعمل كمان كيس باللون التاني ..

( بنعملهم قبل بوقت أحسن)

أنا عملت أخضر وأحمر




بنبلش نشكل الكُرات .. وبنغطس بجوز الهند

وبنرتبهم بصحن وبنخليهم بالتلاجة لوقت التقديم














الخميس، 3 نوفمبر 2011

صينية كفتة

صينية كفتة 




المقادير:


لحمة كفتة عليها بقدونس وبصل وملح وفلفل وبهارات طبعا وهيل 

بطاطا .. بندورة .. فلفل حار لو بتحبوه .. زيت وماء


بنكفت اللحمة وبنصفها بصينية مدهونة زيت

بنقطع بطاطا أصابع طويلة وبنرش عليها ملح وفلفل وبنحطها بين الكفتة 

متل هيك







بنفرم عالوجه بصل وبندورة وفلفل حار لو بتحبوه

بنرش عليهم رشة ملح وفلفل عالوجه وممكن نحط معلقتين زبدة نباتية صغار 


بنحط عليها مي 
و
بنلفها بورق قصدير

بنغليها شي ربع ساعة عالغاز وبعدين بندخلها الفرن لتستوي

وبنقدمها مع الأرز 


 

السبت، 29 أكتوبر 2011

كيــكــة الــجزر

المكونات



قائمة 1


4 بيض

كاستين سكر

كاسة زيت نباتي

فانيلا سائل

رشة جوزة الطيب

قرفة حسب الرغبة أو بحدود 3 ملاعق طعام

1 م ك عصير ليمون

برش ليمون



قائمة 2


تلات معالق صغار بيكينغ باودر
1 م ص كربونات

كاستين وربع طحين

جزر مبشور 6 حبات كبار  \ زبيب \ جوز مكسر



الطريقة 

بنقوم بتنخيل مكونات قائمة 2 مع بعض ونتركهم ع جنب 
بنخلط مكونات قائمة 1 مع بعض 
بنضيف الجزر المبشور بالتناوب مع خليط الطحين على خليط البيض
وبنخلط منيح

آخر شي بنضيف الجوز والزبيب و بنخلطهم



بنصب الخليط بالقالب المدهون و بالفرن لمدة 50 دقيقة أو ساعة  ع درجة حرارة 180-200


صحة وهنا :)


الجمعة، 28 أكتوبر 2011

مخــشي بطــاطــا ♥


بنحتاج لحمة مفرومة وبطاطا حجم صغير وبصل وبهارات وزيت وصنوبر

* بنقلي اللحمة مع بصل وملح وفلفل وبهارات وزيت

بس تستوي بنشيلها من الطنجرة بصحن وما بنطلع معها زيت

بنقلي صنوبر وبنحطه عليها








دور البطاطا

بنقشرها .. بنحفرها متل الكوسا وبنخلي الأشياء يللي بتطلع منها وبنحطهم بصحن (البطاطا يعني )





بنقلي البطاطا بس لتاخد لون خفيف .. ننتبه إنه ما نخليها تستوي عالآخر




عبين ما تبرد البطاطا بنحضر البايركس

بنجيب البطاطا يللي طلعت من الحفر .. بنحطها جواته ..
بندق كم راس تومة عليهم ملح وبنحطهم عالبطاطا يللي طلعت من الحفر مع فلفل أسود ومكعب ماجي مدوب بكاسة مي سخنة وشوية زيت زيتون





بنحضر عشان نحشي





بنحشي البطاطا وبس نخلص بنخليها ع جنب .. اللحمة يللي زادت من الحشوة بنحطها بالبايركس وبنزيد شوية مي





بنرتب البطاطا







بنغطيها بورق قصدير

ممكن نغليها شوي عالغاز من فوق بعدين بندخلها الفرن شي ساعة وبنحمر الوجه

وبنقدمها مع رز







وصحة وهنا

الاثنين، 3 أكتوبر 2011

كيكة الكروكان الباردة




المقادير:

 هاي المقادير للكمية يللي أنا عملتها 




إستخدمت 6 مغلفات دريم ويب  البايركس كبير والطبقات كنت أحط فيهم كمية منيحة كريمة

حليب سائل خالي الدسم

علبة قشطة

5 باكيتات بسكون ماري

نسكافيه محلول بمي وسكر

سكر ولوز لعمل الكروكان

******

الطريقة:

بنعمل الكريمة كالآتي

كل مغلف حطيتله 115 مل حليب يعني نص كاسة لكل مغلف مو للمغلفات كلهم

بنضيف القشطة ورشة فانيلا .. ممكن نزيد حليب أو كمان باكيت كريمة حسب الجمادة تبعتها

بنحضر البسكوت والنسكافيه




بنبدا نعمل الطبقات




يمكن طلعوا معي 4 طبقات بسكوت وكريمة

وبنحطه بالتلاجة يجمد




الكروكان :

بدنا فنجانين شاي سكر وكمية من اللوز

بنحطهم عالنار بمقلاة غير لاصقة

بنحضر صحن يكون زجاج مو بلاستيك  وبندهنه نتوفة زيت بطرف أصبعنا وبنحطه ع جنب

بس يبلش السكر يدوب بنحرك اللوز وهكذا حتى يصير متل الصورة





ع طول بنديره بالصحن وندير بالنا ما نمسكه بإيدنا ونخليه يبرد منيييييح ع جنب


بس يبرد شي 3 ساعات بنشيله من الصحن وبندقه

بنرشه عالوجه قبل التقديم وصحة وهنا