الخميس، 3 نوفمبر 2011

صينية كفتة

صينية كفتة 




المقادير:


لحمة كفتة عليها بقدونس وبصل وملح وفلفل وبهارات طبعا وهيل 

بطاطا .. بندورة .. فلفل حار لو بتحبوه .. زيت وماء


بنكفت اللحمة وبنصفها بصينية مدهونة زيت

بنقطع بطاطا أصابع طويلة وبنرش عليها ملح وفلفل وبنحطها بين الكفتة 

متل هيك







بنفرم عالوجه بصل وبندورة وفلفل حار لو بتحبوه

بنرش عليهم رشة ملح وفلفل عالوجه وممكن نحط معلقتين زبدة نباتية صغار 


بنحط عليها مي 
و
بنلفها بورق قصدير

بنغليها شي ربع ساعة عالغاز وبعدين بندخلها الفرن لتستوي

وبنقدمها مع الأرز 


 

السبت، 29 أكتوبر 2011

كيــكــة الــجزر

المكونات



قائمة 1


4 بيض

كاستين سكر

كاسة زيت نباتي

فانيلا سائل

رشة جوزة الطيب

قرفة حسب الرغبة أو بحدود 3 ملاعق طعام

1 م ك عصير ليمون

برش ليمون



قائمة 2


تلات معالق صغار بيكينغ باودر
1 م ص كربونات

كاستين وربع طحين

جزر مبشور 6 حبات كبار  \ زبيب \ جوز مكسر



الطريقة 

بنقوم بتنخيل مكونات قائمة 2 مع بعض ونتركهم ع جنب 
بنخلط مكونات قائمة 1 مع بعض 
بنضيف الجزر المبشور بالتناوب مع خليط الطحين على خليط البيض
وبنخلط منيح

آخر شي بنضيف الجوز والزبيب و بنخلطهم



بنصب الخليط بالقالب المدهون و بالفرن لمدة 50 دقيقة أو ساعة  ع درجة حرارة 180-200


صحة وهنا :)


الجمعة، 28 أكتوبر 2011

مخــشي بطــاطــا ♥


بنحتاج لحمة مفرومة وبطاطا حجم صغير وبصل وبهارات وزيت وصنوبر

* بنقلي اللحمة مع بصل وملح وفلفل وبهارات وزيت

بس تستوي بنشيلها من الطنجرة بصحن وما بنطلع معها زيت

بنقلي صنوبر وبنحطه عليها








دور البطاطا

بنقشرها .. بنحفرها متل الكوسا وبنخلي الأشياء يللي بتطلع منها وبنحطهم بصحن (البطاطا يعني )





بنقلي البطاطا بس لتاخد لون خفيف .. ننتبه إنه ما نخليها تستوي عالآخر




عبين ما تبرد البطاطا بنحضر البايركس

بنجيب البطاطا يللي طلعت من الحفر .. بنحطها جواته ..
بندق كم راس تومة عليهم ملح وبنحطهم عالبطاطا يللي طلعت من الحفر مع فلفل أسود ومكعب ماجي مدوب بكاسة مي سخنة وشوية زيت زيتون





بنحضر عشان نحشي





بنحشي البطاطا وبس نخلص بنخليها ع جنب .. اللحمة يللي زادت من الحشوة بنحطها بالبايركس وبنزيد شوية مي





بنرتب البطاطا







بنغطيها بورق قصدير

ممكن نغليها شوي عالغاز من فوق بعدين بندخلها الفرن شي ساعة وبنحمر الوجه

وبنقدمها مع رز







وصحة وهنا

الاثنين، 3 أكتوبر 2011

كيكة الكروكان الباردة




المقادير:

 هاي المقادير للكمية يللي أنا عملتها 




إستخدمت 6 مغلفات دريم ويب  البايركس كبير والطبقات كنت أحط فيهم كمية منيحة كريمة

حليب سائل خالي الدسم

علبة قشطة

5 باكيتات بسكون ماري

نسكافيه محلول بمي وسكر

سكر ولوز لعمل الكروكان

******

الطريقة:

بنعمل الكريمة كالآتي

كل مغلف حطيتله 115 مل حليب يعني نص كاسة لكل مغلف مو للمغلفات كلهم

بنضيف القشطة ورشة فانيلا .. ممكن نزيد حليب أو كمان باكيت كريمة حسب الجمادة تبعتها

بنحضر البسكوت والنسكافيه




بنبدا نعمل الطبقات




يمكن طلعوا معي 4 طبقات بسكوت وكريمة

وبنحطه بالتلاجة يجمد




الكروكان :

بدنا فنجانين شاي سكر وكمية من اللوز

بنحطهم عالنار بمقلاة غير لاصقة

بنحضر صحن يكون زجاج مو بلاستيك  وبندهنه نتوفة زيت بطرف أصبعنا وبنحطه ع جنب

بس يبلش السكر يدوب بنحرك اللوز وهكذا حتى يصير متل الصورة





ع طول بنديره بالصحن وندير بالنا ما نمسكه بإيدنا ونخليه يبرد منيييييح ع جنب


بس يبرد شي 3 ساعات بنشيله من الصحن وبندقه

بنرشه عالوجه قبل التقديم وصحة وهنا






الجمعة، 26 أغسطس 2011

تــــشـــيز كـــيكـ الكرز

تــــــشـــــيز كـــــــــيكـ الكرز 

♥♥



المقادير

3 مغلفات دريم ويب

مغلف جيلو ع كرز

مغلف كريم كراميل

علبتين قشطة

9 حبات كيري

115 مل حليب سائل وكمان نتوفة يعني بيطلعوا سوا شي كاسة

بسكوت دايجستف وأصبع زبدة غير مالحة


الطريقة 


طبعا بنكسر البسكوت وبنخلطه مع الزبدة الدايبة وبنحطه بالقالب المتحرك

بنخلط المكونات الباقية سوا طبعا شوي شوي مو دفعة وحدة

وبنحطهم فوق البسكوت

بس تجمد تاني يوم بنحط عالوجه topping ع كرز أو الطعم يللي بنحبه

وصحة وهنا


الوصفة من صفحة أطباقنا البيتية 



تيـــــــراميــــسو



المقادير

5 حبات كيري

3 مغلفات دريم ويب

مغلفين كريم كراميل

باكيتين بسكوت أصابع (lady's finger)

علبة قشطة

حليب سائل (خالي الدسم)

نسكافيه محلول بماء فاتر ما بتغلي كتير



الطريقة

بنخلط الدريم ويب كل مغلف مع 115 مل حليب سائل

بس ينخلطوا منيح بنضيف القشطة والجبنة والكريم كراميل بالتدريج

بنغطس البسكوت بالنسكافيه ,, بس ننتبه إنه بسرعة بتشرب النسكافيه يعني لازم نغطسه بسرعه ونشيله غير هيك بدوب

وبنصفه بالكاسات أو القالب وبنحط طبقة كريمة وبنرجع بنغطس بسكوت وبنضيف كريمة

بس تجمد بنرش عليها كاكاو بودرة وبنزينها متل ما بنحب

لزيادة الكمية بنضيف مغلف دريم ويب مع 115 مل حليب وحبة جبنة كيري






الخميس، 25 أغسطس 2011

لحمة ع ورقة




المقادير

بدنا لحمة مفرومة فيها بصل وبقدونس وبهارات طبعا وملح

بندورة ,, بصل ,, زيت زيتون ,, ليمون وملح وفلفل أسود وزبدة نتوفة

وأهم شي ورق عنب


الطريقة

بنجيب كم ورقة بنحطهم متل ماهو موضح بالصورة

بنمسك كمية من اللحمة و بنعملها دائرة

بعدين بنحطها بنص الورقات وبنرصها كأنا عم نعمل همبرغر

وبنجيب أطراف الورق وبنجمعه عاللحمة وبنقلبها

الصورة التوضيحية 


بنحطها بالصينية



بنفرم بندورة




بنفرم بصل وبنرش فلفل وملح وليمون وزيت زيتون


بنضيف نتوفة زبدة


بعدين بنحطها شي 20 دقيقة عالغاز من فوق بنكون مغطيينها بورق قصدير وخازقينه شوي

بندخلها الفرن عبين ما تستوي وبنحمر الوجه عشان الورق شوي يتحمر






وصحة وهنا