الخميس، 2 فبراير 2012

كيكة الكريم كراميل



المقادير

بدنا 4 باكيتات كريم كراميل
بسكوت ماري حجم صغير 2
بسكوت أولكر باكيت واحد
قالبين كيك أمريكانا نوع ماربل كيك
حليب ناشف
نسكافيه معلقة كبيرة
قشطة علبة
كاكاو معلقتين كبار
ماء


الطبقة الأولى كالتالي


بالقالب المتحرك بنفتت قالبين إلا شوي 
بنحضر معلقة كبيرة نسكافيه مخلوطة بماء ساخن وبنصب منها عالكيك بعد ما نرصه
حتى ما يتفتت بس نقطعها

بتركه فترة صغيره بالتلاجة يجمد

~~

الطبقة التانية

بنكسر بسكوت الماري (ممكن نبدله بباكيت أولكر) وبنحطه فوق الكيك




الطبقة التالتة


بنكون محضرين الخلاط وعلبة قشطة و معلقة نسكافيه
بنفتت باكيت بسكوت الأولكر وبنخليه جنب الخلاط




بطنجرة بنحط المكونات التالية
باكيتين كريم كراميل 
4 معالق كبار حليب ناشف
كاستين مي 
بنخلطهم وبنحطهم عالنار 



أول ما يغلي الخليط بنحطه بالخلاط مع البسكوت الأولكر والقشطة ومعلقة النسكافيه
بنخلط بسرعة لأنه رح يجمد عالسريع
وع طول بنديره فوق بسكوت الماري يللي بالقالب



بنحط القالب بالتلاجة يجمد


الطبقة الأخيرة عبارة عن


باكيتين كريم كراميل
4 معالق كبار حليب ناشف
نص فنجان سكر
معلقتين كبار كاكاو مدوبين بنص كاسة مي
وكاستين مي

بطنجرة بنخلطهم كلهم وعالنار عبين ما يغلوا
بنشيل الخليط عن النار بنتركه خمس دقايق يبرد شوي
وبنديره بالقالب وبنتركه يبرد عالآخر

وبنحطه بالتلاجة يجمد لوقت التقديم

بس نقدمه بنشيله من القالب
وبنزينه بالكراميل 

وصحة وهنا







الثلاثاء، 13 ديسمبر 2011

Spaghetti


لحمة مفرومة

بصل عدد 3 صغار

رب بندورة 4 معالق كبار

بندورة مفرومة .. أنا إستخدمت بندورة علب بتكون حب

ملح ,, فلفل ,, هيل مطحون ,, بهار سادة وبهار مشكل

زيت معلقتين ومعلقة زبدة نباتية

معكرونة سباغيتي 



بنحط الزيت والزبدة بطنجرة عالنار

بنضيف البصل وبنتابع تحريكه مع إضافة رشة ملح وفلفل أسود عليه

بس يدبل شوي بنضيف اللحمة وبنحركها

بنحط البهارات المذكورة فوق

بنغطي الطنجرة حتى تستوي اللحمة وتنزل ميتها

بنضيف البندورة الحب ورب البندورة

إذا كانت جامدة بنزيد شوية مي عليهم

بنخليها مغطية وعالنار حتى تستوي منيح

المعكرونة

بنحضر طنجرة كبيرة فيها مي وعليها ملح

بنغليها عالغاز ,, بس تغلي بنضيف زيت نباتي حتى ما تلزق المعكرونة

بنضيف المعكرونة وبنخليها لحتى تستوي

بنصفيها وبنشطفها وبنرش عليها رشة زيت صغيرة حتى تضلها منيحة وماتلزق بس تبرد

بنقدمها مع الصلصة 

وصحة وهنا











الخميس، 8 ديسمبر 2011

دجاج مشوي بصوص الباربكيو الحار



4 صدور دجاج 

فطر مقطع وفطر حب كامل

جزر مقطع وسط

بازيلا وجزر

بصل وتوم

البهارات كالتالي

صوص الباربكيو

عصير نص برتقالة

رشة هيل مطحون وفلفل أسود وبابريكا بودرة
وملح وبهارات سادة
طبعا حسب الرغبة وكيف بتحبوا طعمة البهارات

ليمون معصور .. زيت وشوية مي

الطريقة

من قبل بيوم بنغسل الدجاج وبنبهره بالبهارات المذكورة فوق ما عدا المي
بنضيفله بصلة مبشورة وكم سن توم والفطر المقطع

الباربكيو صوص حارة .. يعني بنحط قد ما بنحب

تاني يوم بنضيف للصينية الخضار الباقية يللي هي
البازيلا والجزر والفطر الحب وكمان بصلة بنفرمها شرائح كبيرة

بنضيف شوية مي وبنرش عالوجه رشة بابريكا باودر





بنغطيه بورق القصدير

وبالفرن ع درجة حرارة 200 لمدة ساعة أو ساعة ونص

بنقدمه مع البطاطا المقلية والكول سلو

وصحة وهنا








الجمعة، 2 ديسمبر 2011

мuɢαĐαЯa ™



كوب عدس 
كوبين رز
ملح وفلفل أسود
بصل
زيت لقلي البصل


بنغسل العدس وبنحطه بطنجرة مع كاسة ونص مي وبنحطهم عالنار
بنضيف ملح وفلفل وبنخلي العدس يغلي لحد الإستواء

بنغسل الرز وبننقعه بمي دافية وملح نص ساعة
بنشطف الرز وبنصفيه 

بنسخن العدس بالمي تبعته
بنضيف الرز
إذا كانت المي قليلة بنضيف شوي
بس ننتبه ما نكتر حتى ما يخبص
بنضل نتفقده إذا بحاجة مي أو لأ
بس يتشرب المي بننقله عنار خفيفة

بنقطع بصل سرائح رفيعة
بنقلي البصل بالزيت النباتي
بس نخلص بنضيف من زيت البصل وهو حامي عالمجدرة

بنقدمها مع البص المقلي والعادي والمخللات 

وصحة وهنا











♥ Eggs ♥

♥ Eggs ♥




Scrambled Eggs with Hot dogs


أربع بيضات 
نقانق مقطعين دوائر 
زيت نباتي
ملح وفلفل

بنخفق البيض بزبدية وبنرش عليه ملح وفلفل 
بنحضر مقلاية وبنحط فيها زيت نباتي مقدار معلقتين
بنضيف النقانق .. وبنحرك حتى يتحمروا شوي
بنضيف البيض وع طول بنحركه حتى يتجانس مع النقانق بعدين بنوقف التحريك
بس نشوف أطراف البيض بلشت تطلع وتستوي بنحركه وبنضل نحرك حتى يستوي
وبنقدمه بصحن وبنرش عالوجه فلفل أسود





Scrambled Eggs with Cheddar Cheese


بيض عدد 2
سلايز جبنة شيدر مقطع لـ 9 مربعات
ملح وفلفل
زيت نباتي

بنخفق البيض بزبدية وبنرش عليه ملح وفلفل 
بس يتخلطوا منيح بنضيف 5 مربعات جبنة وبنحركهم شوي شوي 
بنحمي الزيت بالمقلاية
بنضيف البيض وبنخليه بدون تحريك
بس تبلش الأطراف تطلع وتستوي بنحرك البيض بشوكة 
بنتابع التحريك بس شوي شوي وقبل ما نطفي النار بنحط باقي الجبنة عالوجه بدون تحريكها
بنقدمه بالصحن وبنرش شوية فلفل عالوجه





بيض عيون


بيضة 
ملح وفلفل
زيت للقلي

بنحط الزيت بالقلاية وبنضيفله ملح وفلفل 
بنخليه يسخن وبنضيف البيضة عالمقلاية ع طول
بمعلقة بنضيف من الزيت يللي حول البيضة عالبيضة حتى تستوي من فوق
عشان نتأكد من إستواء الصفار بطرف المعلقة بنضغط عليه وبنحط عليه زيت من يللي بالمقلاية
طبعا ناس بتحبه يكون نص مستوي وناس مستوي كتير
كله حسب الرغبة

وصحة وهنا